ANOSAGALICIA

O nacionalismo é garantía de honradez

Rubén Cela é o candidato do BNG a alcaldía de Santiago de Compostela. Quere apostar pola creación de emprego, polos servizos sociais e pola identidade galega.

O candidato do BNG á Alcaldía de Santiago de Compostela, Rubén Cela, afirma nesta entrevista que “a xente quere que o nacionalismo forme parte do Goberno desta cidade, porque é garantía de saber facer, de honradez, de rigorosidade no traballo e de compromiso”. Rubén Cela é licenciado en Economía pola USC e especialista en Dereito Tributario, e responsábel local do BNG e milita no nacionalismo desde os 16 anos, nos Comités Abertos de Estudantes (CAE), nos Comités Abertos de Facultade (CAF) e en Galiza Nova, da que foi secretario xeral. Foi director xeral de Xuventude da Xunta de Galiza e, actualmente, traballa como economista no ámbito da consultoría privada.

"O Xacobeo demostrou que non foi a panacea para Santiago, que viñese ou non Zapatero foi indiferente".

1-¿Como valora esta lexislatura?
Creo que este mandato no que o BNG ostentou as áreas de Cultura, Promoción Económica, Medio Ambiente e Rehabilitación foi moi positivo para a cidade, como tamén o foi a última década na que os nacionalistas estivemos no Goberno de Santiago. Non só os diversos premios recibidos, senón tamén os cidadáns e cidadás recoñecen o labor distintivo do BNG no Concello de Santiago. A partir de agora, seguiremos por esta liña iniciada, aproveitando a experiencia adquirida pero tamén con nova seiva e enerxía que lle dará un impulso decidido ao proxecto nacionalista de Compostela.

2-¿Qué lle diría a persoa que poida pensar que o BNG só é un comodín para que poida haber un alcalde socialista en Compostela?
O BNG ten un proxecto de cidade que, nalgúns casos, pode que conflúa co doutras forzas políticas cando o que propoñen é favorábel ao desenvolvemento da cidade. Aínda así, os nacionalistas temos un modelo propio que, coa axuda dos santiagueses e santiaguesas, poderemos plasmar, deixando o selo distintivo das cousas ben feitas que conseguen unha cidade máis habitábel e sostíbel.

3- ¿Qué perspectivas electorais teñen?
Presentámonos cun Programa de Goberno 2011-2015 para realizar no vindeiro mandato, presentámonos, como é lexítimo, para acadar o maior número de apoios ao noso proxecto e o que percibimos durante os encontros que mantemos con diversos colectivos da cidade é unha gran receptividade e unha corrente de simpatía cara ao BNG. A xente quere que o nacionalismo forme parte do Goberno desta cidade, porque é garantía de saber facer, de honradez, de rigorosidade no traballo e de compromiso.

4- ¿Que necesita esta cidade?
Santiago de Compostela precisa un impulso a nivel de oportunidades de creación de emprego, unha reordenación do tráfico rodado e o compromiso político entre as distintas administracións no ámbito das infraestruturas, para que poida ser un motor económico, social e cultural do País.

"As novas tecnoloxías non están rifadas cos libros, coa música ou cos amigos"

5- Que tal se leva que vostede coas novas tecnoloxías…
Ben, utilizo o Facebook e o Twitter, nos que dou conta da actividade política. Uso unha Blackberry que me permite estar informado en todo momento e tamén manexo o ordenador, creo que son unhas ferramenta de traballo máis neste tempo no que a inmediatez informativa é importante para desenvolver o labor político. Aínda así, non creo que as novas tecnoloxías estean rifadas cos libros, coa música, cos amigos e amigas ou mesmo coa natureza. Son un instrumento máis ao servizo dos usuarios e das usuarias, non un fin en si mesmo.

6- ¿Cómo está a ser este tempo que transcorreu desde que o elixiron como
candidato a alcaldía?
A verdade é que estou moi satisfeito co traballo que realizamos os membros da candidatura do BNG, hai boa sintonía porque coincidimos en considerar que esta precampaña debe estar centrada en escoitar á xente, en definir as propostas de cada quen para o futuro, en explicalas, debatelas e compartilas. Así, celebramos os chamados “cafés para cinco”, cos que compartimos as inquedanzas da xente que quere coñecerme como candidato; encontros sectoriais con colectivos sociais asentados na cidade e, sobre todo, o intercambio de propostas para introducir no programa co que gobernaremos os vindeiros catro anos.

7- ¿Debeu vir Zapatero a Santiago durante o Xacobeo?
O Xacobeo demostrou que non foi a panacea para Santiago, que viñese ou non Zapatero foi indiferente.

8-Por último, dígame tres cousas que pode aportar o Bloque a esta cidade
A primeira, unha clara vocación de crear emprego; a segunda, potenciar os servizos sociais, públicos e de calidade; e a terceira,  a identidade: o orgullo de ser galego, santiagués e universal.

• < Previo