Aymerich e Guillerme

 Máis BNG organizouse coma corrente. Os seus membros están preparándose para un posible pulso coa veterana U.P.G. que ven marcando a pauta e o ritmo da partitura que interpreta o Bloque Nacionalista Galego.

O líder de Máis BNG lanzou a proposta da celebración dunha Asamblea Nacional para o 2010. O seu propósito é fortalecer o organización, pero xa hai quen cree que despois de ensinar músculo na xuntanza  de Compostela, Carlos Aymerich está disposto a medir as súas forzas coa emblemática Unión do Povo Galego. Evidentemente a idea parece estar clara.

No seu discurso Aymerich, falou de ampliar o espectro do nacionalismo de esquerdas cunha proposta moi socialdemócrata que se distancia máis dos postulados marxistas da “U”. Desde a asamblea do Bloque, xa quedaba claro que o importante respaldo da opción Aymerich podería derivar na estructuración interna en corrente ou , nun futuro, ata nun partido político dentro da formación frontista.

A batalla política non cesa e cadaquén move as súas fichas. De momento a U.P.G. controla as decisións, tendo coma cabeza visible a Guillermo Vázquez, portavoz nacional. Pero Carlos Aymerich ten unha grande dose de protagonismo, xa que é o voceiro parlamentario e ten tribuna mediática asegurada. Son os dous referentes do nacionalismo galego, que buscan o timón. Guillermo coa máxima autoridade pero sen escano, Aymerich con escano  e voz  pero sen o bastón de mando. E por detrás, o profesor Beiras presidindo o think-thank da organización.